Kathaṁ “sukhapaṭisaṁvedī assasissāmī”ti sikkhati, “sukhapaṭisaṁvedī passasissāmī”ti sikkhati? Sukhanti dve sukhāni—kāyikañca sukhaṁ, cetasikañca sukhaṁ. Katamaṁ kāyikaṁ sukhaṁ? Yaṁ kāyikaṁ sātaṁ kāyikaṁ sukhaṁ, kāyasamphassajaṁ sātaṁ sukhaṁ vedayitaṁ, kāyasamphassajā sātā sukhā vedanā—idaṁ kāyikaṁ sukhaṁ. Katamaṁ cetasikaṁ sukhaṁ? Yaṁ cetasikaṁ sātaṁ cetasikaṁ sukhaṁ, cetosamphassajaṁ sātaṁ sukhaṁ vedayitaṁ, cetosamphassajā sātā sukhā vedanā—idaṁ cetasikaṁ sukhaṁ.
Kathaṁ te sukhā paṭividitā honti? Dīghaṁ assāsavasena cittassa ekaggataṁ avikkhepaṁ pajānato sati upaṭṭhitā hoti. Tāya satiyā tena ñāṇena te sukhā paṭividitā honti. Dīghaṁ passāsavasena cittassa ekaggataṁ avikkhepaṁ pajānato sati upaṭṭhitā hoti. Tāya satiyā tena ñāṇena te sukhā paṭividitā honti …pe… sacchikātabbaṁ sacchikaroto te sukhā paṭividitā honti. Evaṁ te sukhā paṭividitā honti. Sukhapaṭisaṁvedī assāsapassāsavasena vedanā upaṭṭhānaṁ sati anupassanā ñāṇaṁ. Vedanā upaṭṭhānaṁ, no sati; sati upaṭṭhānañceva sati ca. Tāya satiyā tena ñāṇena taṁ vedanaṁ anupassati. Tena vuccati—“vedanāsu vedanānupassanāsatipaṭṭhānabhāvanā”ti.
Anupassatīti kathaṁ taṁ vedanaṁ anupassati. Aniccato anupassati …pe… evaṁ taṁ vedanaṁ anupassati. Bhāvanāti catasso bhāvanā …pe… āsevanaṭṭhena bhāvanā. Sukhapaṭisaṁvedī assāsapassāsānaṁ saṁvaraṭṭhena sīlavisuddhi …pe… sukhapaṭisaṁvedī assāsapassāsavasena cittassa ekaggataṁ avikkhepaṁ pajānato …pe… pajānanto indriyāni samodhāneti. Tena vuccati—“samatthañca paṭivijjhatī”ti.
Kathaṁ “cittasaṅkhārapaṭisaṁvedī assasissāmī”ti sikkhati, “cittasaṅkhārapaṭisaṁvedī passasissāmī”ti sikkhati? Katamo cittasaṅkhāro? Dīghaṁ assāsavasena saññā ca vedanā ca cetasikā—ete dhammā cittapaṭibaddhā cittasaṅkhārā. Dīghaṁ passāsavasena saññā ca vedanā ca cetasikā—ete dhammā cittapaṭibaddhā cittasaṅkhārā …pe… sukhapaṭisaṁvedī assāsavasena … sukhapaṭisaṁvedī passāsavasena saññā ca vedanā ca cetasikā—ete dhammā cittapaṭibaddhā cittasaṅkhārā—ayaṁ cittasaṅkhāro.
コメント